Funsionario Kontratado Foun HNGV husi Diresaun Enfermagen e Parteira HNGV Rona Deskursu husi Concelho Directiva HNGV iha Resinto HNGV Dili ( Foto/Media HNGV)
Funsionariu kontratado foun nebe’e hahu servisu iha Hospital Nacional Guido Valadares (HNGV-sigla Portugues) tenke servisu ho pontualidade,responsabilidade no atendimentu ho fuan no domin ba ita nia pasiente.
Informasaun hirak ne’e hato’o husi Diretora Ezekutiva HNGV, Cecilia Barros Mendonça iha ninia deskursu Seremonia simu funsionario foun HNGV iha resinto Jardim HNGV Dili , Kuarta Feira,24/1/2024.
Diretora Ezekutiva HNGV, Cecilia Barros Mendonça hatutan fulan kotuk liu ba Ministeiro da Saúde fo sai konkursu públiku ba vaga kontratadu ne’ebe destaka ba HNGV, INFPM, Hospital Referal no Munisipu sira.
Nia dehan aplikante barak mak konkore ba vaga HNGV hamutuk 2000 pesoas resin no resultado ikus 229 pesoas maka admite tamba ne’e funsionario ne’ebe admiti tenke aproveita oportunidade no utiliza servisu ho diak.
“Oportunidade ho knar agora ita simu sira ne’e tenke utiliza ho diak tamba ita hatene ona 2000 pesoas mak kompete iha vaga ida ne’e maibe 229 pesoas maka passa tamba ne’e tenke servisu ho pontualidade, responsabilidade no domin” Dehan Diretora Ezekutiva HNGV.
Deskursu husi Diretora Executiva HNGV, Cecilia Barros Mendonca ba seremonia simu funsionario Kontratado Foun Hospital Nacional Guido Valadares iha Resinto HNGV Dili (Media HNGV)
Iha fatin hanesan Diretora Enfermagen no Paretira HNGV, Maximiniana L.S. Ferrão iha ninia deskursu hateten ema sira ne’ebe atu mai servisu iha HNGV la fasil tamba liu husi prosesu ne’ebe naruk no todan teb-tebes ne’ebe ema rihun rua resin nebe kompete maibe 229 bele prense vaga ida ne’e.
Diretora Enfermagen no Parteira HNGV apelu ba servisu médiku, enfermagen ho parteira atu servisu iha liña kordenasaun diak, tenke uja uniforme ne’ebé apropriadu no manten étika komunikasun iha servisu atendimentu.
“Hau apelu ba diresaun enfermagen no kliníka sira ita bo’ot sira tenke servisu iha liña kordenasaun, obedese ba ita nia hirarkia, uja farda mutin sai hanesan ita nia identidade profissional saúde, manten étika komunikasaun ho pasiente, la iha diferensia kor, halo knar ho profesional no respeita segredu pasiente nian” Tenik Diretora Enfermagen no Parteira HNGV.
Deskursu husi Diretora Enfermagen no Parteira HNGV, Maximiniana L.S. Ferrão ba seremonia simu funsionario Kontratado Foun Hospital Nacional Guido Valadares iha Resinto HNGV Dili (Media HNGV)
Iha Fatin hanesan Diretora Administrasaun, Finansas, Logistica no Aprosionamentu HNGV (AFLA), Sara Maria F. Xavier iha ninia deskursu husu ba funsionariu foun sira tenke respeita, hadomi kompaisaun, disiplina no kaer metin Kodigu étika no konduta husi profissional saúde iha HNGV.
“Públiku kestiona ho HNGV nia atindimentu nune’e hau husu ita nudar profissional saúde atu halo servisu tuir kodigu étika no konduta husi profissional saúde iha HNGV ne’ebé tenke respeita, hadomi, kompaisaun no utiliza midia social ho lolos hodi assegura privasidade pasiente sira nian atu labele hasai faktus ne’ebe lalos no labele vuatus hodi espalla ba iha públiku hodi kria konfusaun” Dehan Diretora AFLA.
Alende ne’e mos Diretor Servisu Apoio Daignostico no Terapéutico HNGV, Dr.Vidal de Jesus Lopes iha ninia deskursu hakarak fo mensagen ba funsionario foun ne’ebe destaka mai HNGV tenke aproveita ho diak-diak servisu hodi buka tuir maneira aprende tamba HNGV sai hanesan ospital terciaria nune’e eleva staff nia kapasidade no abilidade hodi fo asistensia diak liu tan ba maluk sira ne’ebe persija tulun.
Deskursu husi Diretora Administrasaun, Finansas, Logistica no Aprosionamentu HNGV (AFLA), Sara Maria F. Xavier ba seremonia simu funsionario Kontratado Foun Hospital Nacional Guido Valadares iha Resinto HNGV Dili (Media HNGV)
Deskursu husi Diretor Servisu Apoio Daignostico no Terapéutico HNGV, Dr.Vidal de Jesus Lopes ba seremonia simu funsionario Kontratado Foun Hospital Nacional Guido Valadares iha Resinto HNGV Dili (Media HNGV)
Entertantu total Funsionario Foun ne’ebé admite iha HNGV hamutuk 229 pesoas kompostu husi Asessor Juridiku 1, Engineiru Arsitektur 1, Engineiru Civil 1, Mediku Jeral 10, Secretaria 2, Enfermeiro/a 110, Dentaria 3, Parteira 20, Tekniku Radiologia 7, Tekniku Laboratorio 10, Tekniku Farmacia 7, Tekniku Nutrisaun 3, Oftamologia 4, Enfermeiro Jeral Anesthesia 4, Administrasaun Logistika 15, Saúde Públika 5, Motorista 4 no Servisu Limpeza 20.
Marka Prezensa iha Seremonia ne’e husi Concelho Diretiva HNGV, Xefi Gabinete , Xefi Departamento no Xefi Unidade HNGV.
Media HNGV/Theo