Ospitál primeiru iha Timor-Leste ho naran Hospital Central Dr. António de Carvalho, lokaliza iha Lahane, iha português nia tenpu to’o 1975. Naran ne’e homenajen ba médiku husi Portugal ne’ebé durante invazaun Japão nia refujia ba Flores, Indonésia, iha semináriu.
Iha loron 11 Abril 1983, Hospital Dr. António de Carvalho transfere ba edifisiu foun iha Rua Toko Baru. Hospital António de Carvalho sai nu’udar Hospital Militar ho naran Rumah Sakit Umum Pusat Dili(RSUP) to’o fulan Setembru tinan 1999.
Iha loron 19 de Setembro1999 International Committee for Red Cross (ICRC) maka jere Ospitál to’o 29 Juñu 2001. Iha 29 de Junho 2001 Governo Tranzisaun (East Timor TransitionAdministration-ETTA) simu husi ICRC ba Hospital Nasionál Dili, nu’udar Hospital Nasionál.
Iha dia 29 de Junho 2003 Hospital Nacional Dili, troka Naran ba Hospital Nacional Guido Valadares(HNGV). Sai nu’udar homenajen ba enfermeiru Guido Valadares ne’ebé lidera Hospital António de Carvalho ikus, to’o okupasaun Indonésia.
Iha 2016, liu husi Dekretu – lei no 39/2016, 14 Setembru, Hospital Nacional Guido Valadares sai nu’udar entidade ho autonomia administrativu, finanseira no patrimoniál, tipu institusionál no mós referênsia ba prestasaun kuidadu terseáriu, ho nia signifikadu presta servisu saúde ba espesialidade balun.