Vigario Foráneo, Dili Oriental, Pe. Angelo Salsinha fo bensa ba moras sira wainhira partisipa misa selabrasaun loron mundial ema moras ba dala XXXII 2004 iha HNGV (Foto Media/HNGV)
Dili (Media HNGV) tinan ida ne’e mundu tomak selebra loron mundial ema moras ba dala XXXII ho tema Refere ba mensagen husi santidade Papa Fransisco dahuluk nian “Não é conveniente que o homen esteja só, Cuidar do doente. Cuidando das relações”.
Informasaun ne’e hateten husi Prezidenti Komisaun Organizadora , Dra. Ana Maria P Magno iha ninia Deskursu ba selebrasaun loron mundial ema moras ba dala XXXII iha Resinto HNGV (12/2/2024).
Nia hatutan mensagem husi santidade papa Fransico foti iha Bibilia Sagrada Genesis 2 :18 ne’ebé koalia kona ba ema ida sei la moris mesak maibe se hamaluk husi ema seluk oinsa atu kuidadus relasaun entre profesional saúde no pasiente sira.
Prezidenti komisaun Organizadora , Dra. Ana Maria P Magno nia hateten selebrasaun loron mundial ba tinan ne’e hetan orsamento hamutuk $4.496,50 aloka husi orsamentu jeral do estadu 2024 HNGV ne’ebe aloka ba Misa Eukaristia, Fahe Presente ba ema moras no bebidas.
Prezidenti komisaun Organizadora , Dra. Ana Maria P Magno, Hato’o ninia deskurusu iha selebrasaun loron mundial ema moras dala XXXII 2024 iha resinto HNGV (Foto Media/HNGV)
Iha fatin hanesan Vise-Ministru ba Fortalesimentu instituisional Saúde, José dos Reis Magno iha ninia deskursu hateten kuidadus saúde ne’ebé ita persiza oferese ba pasiente no familia pasiente liu husi fo atendimentu ho kompaisaun no tornura.
Vise-Ministru ba Fortalesimentu instituisional Saúde mos dehan pasiente sira nafatin ezizi ba professional saúde sira atu manten servisu iha kualker tempu hodi bele oferese kuidadus saúde ne’ebé diak”.
“Maun alin sira ne’ebé oras nee hetan ona tratamentu iha HNGV kontinua ezizi ba professional da saúde sira atu manten nafatin servisu diak wainhira sira persiza ita nia tulun ne’ebé prontu iha kualker tempu bele oferese kuidadus saúde iha nivel hotu-hotu tantu primaria, sekundaria no terciaria ninian.” José dos Reis Magno hateten.
Vise-Ministru ba Fortalesimentu instituisional Saúde hatutan katak Ministerio Saúde ezizi ba professional saúde atu servisu ekipa nune’e kuidadus saúde ba pasiente sira nakonu ho kompaisaun no domin.
Vise-Ministru ba Fortalesimentu instituisional Saúde, José dos Reis Magno, Hato’o ninia deskurusu iha selebrasaun loron mundial ema moras dala XXXII 2024 iha resinto HNGV (Foto Media/HNGV)
Alende ne’e iha homilia misa selebrasaun loron mundial ema moras ba dala XXXII, Vigario Foráneo, Dili Oriental, Pe. Angelo Salsinha hateten Loron-loron ema la rekoñese professional saúde tamba ema persiza wainhira iha situasaun difisil no isin fraku.
“Rahun diak ba profissional saúde sira, tamba ami kontente iha liur, wainhira at maka ami mai entrega an ba ita bo’ot sira, loron –loron ami nunka rekoñese imi, iha situasaun fraku ona foin ami persiza imi tamba ami hatene katak imi ema ne’ebé rahun diak , basa ho situasaun no vokasaun hanesan imi nian , so imi deit mk bele fo kuidadus no tau matan ba ema moras sira iha situasaun difisil. ” dehan Pe. Angelo Salsinha .
Directora Ezekutiva HNGV, Cecilia Barros Mendonça haktuir pesoal saúde nia prezensa importante tebes ba ema moras sira iha HNGV, nune’e professional saúde tenke fo atindimentu ho fuan no domin.
“Pesoal saúde nia prezensa importante tebes ba ema moras sira iha HNGV ne’ebé moras sira persiza ita nia akompaña maximu hodi fo kuidadus seguru no kualidade, labele husik moras sira mesak, tulun sira ho fuan no domin atu sira sente katak ita nia prezensa folin liu ba sira doque ai-moruk no ekipamentus ne’ebé mak avansadu “ Tenik Directora Ezekutiva HNGV.
Directora Ezekutiva HNGV, Cecilia Barros Mendonça agradese ba Médiku, Enfermeiro/a, Parteira, Tekniku Aliadus, Nivel konselu no Funsionario HNGV ne’ebé durante ne’e servisu diak hodi fo tulun barak ba pasiente hodi hetan ona salvasaun husi HNGV maske se hetan limitasaun barak .
Vigario Foráneo, Dili Oriental, Pe. Angelo Salsinha hato’o ninia homilia iha misa selabrasaun loron mundial ema moras ba dala XXXII 2004 iha HNGV (Foto Media/HNGV).
Directora Ezektiva HNGV, Cecilia Barros Mendonca hato’o ninia deskursu iha selabrasaun loron mundial ema moras ba dala XXXII 2024 iha HNGV ( Foto Media/HNGV)
Emtertantu selebrasaun loron mundial ema moras ba dala XXXII 2024 hahu ho’o misa agradesimentu hamutuk ho pasiente HNGV sira ne’ebe prejidi husi Vigario Foráneo, Dili Oriental hamutuk ho Amu Kapelaun HNGV, Pe. Francisco Barreto no husi Pe. Deonisio Bere no fahe pakote presente no ai-funan hamutuk 400 resin ba pasiente sira iha sala internamentu HNGV.
Remata
Media HNGV/Teo